აფხაზეთის ავტონომიური რესპუბლიკის მთავრობა ულოცავს თურქ ხალხს, თურქეთის ხელისუფლებას და თურქეთის რესპუბლიკის საგანგებო და სრულუფლებიან ელჩს საქართველოში მის აღმატებულება ზექი ლევენთ გუმრუქჩუს ეროვნულ დღესასწაულს - რესპუბლიკის გამოცხადების დღეს.

საქართველოს და თურქეთს ურთიერთობების მრავალსაუკუნოვანი გამოცდილება აკავშირებთ. რომელიც წლებია რაც სტრატეგიულ პარტნიორობასა და კეთილმეზობლურ  ურთიერთობებში  გადაიზარდა.

თურქეთის რესპუბლიკა საქართველოს ერთ-ერთი აქტიური მხარდამჭერია ტერიტორიული მთლიანობის საკითხში და ოკუპირებული ტერიტორიების არაღიარების პოლიტიკის მყარი მიმდევარი, რაც ნამდვილად მეგობრული ჟესტია და კიდევ უფრო ამყარებს ორმხრივ ურთიერთობებს.

ასევე აღსანიშნავია, თურქეთის რესპუბლიკის მხარდაჭერა დევნილებთან მიმართებაში განხორციელებული ჰუმანიტარული პროექტების მიმართულებით, რომელთა იმპლემენტაცია პერმანენტულ ხასიათს ატარებს და არაერთ დევნილს მისცა საშუალება გაეუმჯობესებინა თავისი სოციალურ-ეკონომიკური მდგომარეობა. რაც ნამდვილად დასაფასებელია.

კიდევ ერთხელ, ვულოცავთ თურქეთის რესპუბლიკას ეროვნულ დღესასწაულს და ვუსურვებთ მშვიდობიან, სტაბილურ და დემოკრატიულ განვითარებას როგორც თავისი ასევე რეგიონის საკეთილდღეოდ.

27 ოქტომბერს აფხაზური ენის დღესთან დაკავშირებით აფხაზეთის საჯარო სკოლებში, სადაც ისწავლება აფხაზური ენა,   ჩატარდა ინტეგრირებული გაკვეთილები თემაზე: „აფხაზური ენა და აფხაზეთის ისტორიული ძეგლები“.

მოსწავლეებმა პედაგოგებთან ერთად ისტორიულ ჭრილში, დისკუსიის ფორმატში, აფხაზურ ენაზე ისაუბრეს აფხაზეთის ღირსშესანიშნაობებზე, კერძოდ, ილორის წმინდა გიორგისა და ბედიის, მოქვისა და ახალი ათონის (ივერიის) ტაძრებზე, დიოსკურიისა და ბზიფის ციხეებზე და, ზოგადად, ქართულ–აფხაზურ ისტორიულ ძეგლებზე, მათ წარსულსა და დღევანდელობაზე.  მოსწავლეებმა  წარმოადგინეს აფხაზური ჩანახატები და წაიკითხეს აფხაზური ლექსები. მათ აფხაზური ენის კარგი ცოდნა გამოამჟღავნეს და ასე, საქმით აღნიშნეს ეს დღე. ბოლოს აფხაზეთში მალე დაბრუნების იმედი და მსგავსი დისკუსიებისა და პრეზენტაციების აფხაზ თანატოლებთან ერთად გამართვის სურვილი გამოთქვეს.

27 ოქტომბერი - აფხაზური ენის დღეა. ენისა, რომელსაც საქართველოს კონსტიტუციით, აფხაზეთის ტერიტორიაზე,  ქართულთან ერთად, მეორე სახელმწიფო ენის სტატუსი აქვს მინიჭებული. ამ დღის აღსანიშნავად აფხაზეთის ავტონომიური რესპუბლიკის განათლებისა და კულტურის სამინისტროსთან არსებულ ვ. არქანიას სახელობის არტ-გალერეაში ნინო მიქიაშვილის წიგნის „მერაბ კოსტავა“ წარდგინება გაიმართა. წიგნი ქართულ და აფხაზურ ენებზეა გამოცემული და ის აფხაზურ ენაზე 2016 წელს  „ქართულ-აფხაზურ ურთიერთობათა ინსტიტუტმა“ თარგმნა.

ნინო მიქიაშვილის წიგნი „მერაბ კოსტავა“ (მეორე გამოცემა) აფხაზეთის ა/რ განათლებისა და კულტურის სამინისტროს მხარდაჭერით დაიბეჭდა. წიგნი ბიოგრაფიული ხასიათისაა და მასში   ეროვნული გმირის - მერაბ კოსტავას ცხოვრების (წინაპრები, მოწამეობრივი ცხოვრება, აღსასრული) ამსახველი დოკუმენტური და ფოტო მასალაა წარმოდგენილი. ის თავდაპირველად 2013 წელს დაიბეჭდა ქართულ ენაზე და მისი  წარდგინება 2013 წლის 13 ოქტომბერს ხარაგაულის რაიონის სოფელ ბორითში (იქ, სადაც მერაბ კოსტავა დაიღუპა) შედგა.  

წარდგინებას ესწრებოდა აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია. დამსწრეთ შესავალი სიტყვით მიმართა აფხაზეთის ავტონომიური რესპუბლიკის განათლებისა და კულტურის მინისტრმა დიმიტრი ჯაიანმა. მან აფხაზური ენის დაცვის მნიშვნელობაზე ისაუბრა და დამსწრეთ შეახსენა მერაბ კოსტავას სიტყვები: „ჩვენ მაინც ვიპოვით გზას აფხაზი ხალხის გულებისაკენ!“. საღამო საერთოდაც  ამ სულისკვეთებით წარიმართა.წიგნის ავტორმა ნინო მიქიაშვილმა აღნიშნა: „ამ წიგნის გამოცემით და ამ შეხვედრით გვინდა ვიპოვოთ ჩვენი წილი გზა აფხაზი ხალხის გულებისაკენ“. მერაბ კოსტავას ფასდაუდებელ წვლილზე საქართველოს თავისუფლებისათვის ბრძოლაში ისაუბრეს აფხაზეთის ავტონომიური რესპუბლიკის უმაღლესი საბჭოს დეპუტატმა, მხატვარმა ნუგზარ მგალობლიშვილმა, ენათმეცნიერმა ლევან ღვინჯილიამ, პროფესორმა ვახტანგ ძაბირაძემ, პოეტმა ქეთევან შენგელიამ, აფხაზეთის ავტონომიური რესპუბლიკის უმაღლესი საბჭოს თავმჯდომარემ გია გვაზავამ და სხვ.

დარბაზში საგანგებოდ ამ დღისთვის გამოფენილი იყო აფხაზეთის მხატვრების: ნუგზარ მგალობლიშვილის (მერაბ კოსტავას პორტრეტი), დავით ბაძაღუას, ავთანდილ შენგელიას, ალექსანდრე ხუბუას, ზურაბ ჭედიას, მანონ ბულისკერიას, ელდარ ქავშბაიას, ვალერი ჩარგაზიას, მერაბ ფიფიას ნამუშევრები.

აფხაზური ენის დღესთან დაკავშირებით, ვ. არქანიას არტ-გალერეაში ნინო მიქიაშვილის წიგნის „მერაბ კოსტავა" პრეზენტაცია გაიმართა, რომელიც აფხაზეთის ავტონომიური რესპუბლიკის განათლებისა და კულტურის სამინისტროს მხარდაჭერით გამოიცა. წიგნი  აფხაზურ ენაზე „ქართულ-აფხაზურ ურთიერთობათა ინსტიტუტმა" თარგმნა. წიგნი ბიოგრაფიული ხასიათისაა და ეროვნული გმირის, მერაბ კოსტავას ცხოვრების ამსახველი დოკუმენტური და ფოტო მასალაა წარმოდგენილი.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, აფხაზეთის ავტონომიური რესპუბლიკის უმაღლესი საბჭოს დეპუტატი ნუგზარ მგალობლიშვილი და შემოქმედებითი წრის წარმომადგენლები ესწრებოდნენ.

საღამოზე ისაუბრეს მერაბ კოსტავას ფასდაუდებელ წვლილზე საქართველოს თავისუფლებისათვის ბრძოლაში. ასევე, ხაზი გაესვა წიგნის გამოცემის მნიშვნელობას და როგორც ავტორმა აღნიშნა: „ამ წიგნის გამოცემით და ამ შეხვედრით გვინდა ვიპოვოთ ჩვენი წილი გზა აფხაზი ხალხის გულებისაკენ".

ამასთანავე, აფხაზეთის დევნილი მხატვრების ნამუშევრების გამოფენა მოეწყო.

აფხაზეთის ავტონომიური რესპუბლიკის მთავრობა აფხაზური ენის დღეს ულოცავს აფხაზ თანამოძმეებს და სრულიად საქართველოს. აფხაზური ენა, ქართულ ენასთან ერთად საქართველოს კონსტიტუციის თანახმად სახელმწიფო ენის სტატუსის მატარებელია აფხაზეთში და მისი დაცვა და განვითარება საქართველოს მთავრობის ერთ-ერთ პრიორიტეტთაგანს წარმოადგენს. მთელი საქართველოს ტერიტორიაზე, აფხაზეთის მთავრობას დაქვემდებარებულ საგანმანათლებლო დაწესებულებებში ისწავლება აფხაზური ენა, სოხუმის სახელმწიფო უნივერსიტეტში არსებობს აფხაზური ენის კათედრა, ფუნქციონირებს აფხაზეთის მთავრობის აფხაზურენოვანი საიტი, აფხაზურ ენაზე ითარგმნება  გამოჩენილი მწერლების, პოეტების და საზოგადო მოღვაწეების ნაშრომები, აფხაზეთის სიანფორმაციო უზრუნველყოფის ცენტრის  მიერ ხორციელდება აფხაზურ ენაზე ყოველკვირეული სატელევიზიო გადაცემის ტრანსლაცია და ყოველივე ეს ემსახურება აფხაზური ენის, როგორც ასიმილაციის შედეგად გადაშენების საფრთხის წინაშე მდგომი ენის დაცვისა და ენათა მსოფლიო საგანძურში ღირსეული ადგილის დამკვიდრებას.

კიდევ ერთხელ ვულოცავთ აფხაზურ საზოგადოებას და მთელ საქართველოს მოსახლეობას 27 ოქტომბერს - აფხაზური ენის დღეს და იმედს გამოვთქვამთ, რომ უახლოეს პერიოდში ერთიან,  ძლიერ და დემოკრატიულ ქვეყანაში ქართველი, აფხაზი და ყველა ეროვნების საქართველოს მოქალაქე იზეიმებს ჭეშმარიტ თავისუფლებას, სწრაფ განვითარებას და კეთილდღეობას.

2016 წლის 22 ოქტომბერს ქ. თბილისში, ჭადრაკის სასახლეში აფხაზეთის განათლებისა და კულტურის სამინისტროს სპორტისა და ახალგაზრდობის საქმეთა სამსახურის ინიციატივით და საქართველოს ჭადრაკის  ფედერაციის მხარდაჭერით, ჩატარდა აფხაზეთის ღია პირველობა ჭადრაკში (სწრაფი ჭადრაკი). შეჯიბრში  მონაწილეობდნენ დევნილთა კომპაქტურად ჩასახლებულ ადგილებში მცხოვრები მოსწავლეებით დაკომპლექტებული გუნდები, ასევე მოწვეული სპორტსმენები. შეჯიბრს ესწრებოდნენ საქართველოს ჭადრაკის ეროვნული ფედერაციის ვიცე პრეზიდენტი ზურაბ მიქაძე, აფხაზეთის ა/რ განათლებისა და კულტურის მინისტრის მოადგილე როლანდ ნიჟარაძე.

დაძაბულ პაექრობაში გამოვლინდნენ გამარჯვებულები და გოგონებსა და ვაჟებში ადგილები ასე გადანაწილდა:

გოგონებს შორის:  I ადგილი - მარიამ ფარულავა,     II ადგილი - ანა შელია,     III ადგილი -  ელენე შელია;

ვაჟებს შორის: I ადგილი - ილია კავკასიძე,  II ადგილი - საბა შელია,   III ადგილი - ვახო ფერაძე.

შეჯიბრებაში გამარჯვებულ და პრიზიორ სპორტსმენებს გადაეცათ თასები, მედლები  და შესაბამისი ხარისხის დიპლომები.

ჭადრაკის სასახლეში აფხაზეთის განათლებისა და კულტურის სამინისტროს სპორტისა და ახალგაზრდობის საქმეთა სამსახურის ინიციატივითა და საქართველოს ჭადრაკის ფედერაციის მხარდაჭერით აფხაზეთის ღია პირველობა ჭადრაკში (სწრაფი ჭადრაკი) ჩატარდა. შეჯიბრში დევნილთა კომპაქტურ ჩასახლებაში მცხოვრები მოსწავლეებით დაკომპლექტებული გუნდები და ასევე, მოწვეული სპორტსმენები მონაწილეობდნენ.
 
შეჯიბრს საქართველოს ჭადრაკის ეროვნული ფედერაციის ვიცე პრეზიდენტი ზურაბ მიქაძე და აფხაზეთის ავტონომიური რესპუბლიკის განათლებისა და კულტურის მინისტრის მოადგილე როლანდ ნიჟარაძე ესწრებოდნენ.

გამარჯვებულ და პრიზიორ სპორტსმენებს  თასები, მედლები და შესაბამისი ხარისხის დიპლომები გადაეცათ.

ძვირფასო ვეტერანებო, გილოცავთ ვეტერანის დღეს. თითოეული თქვენთაგანი თავდადებით იბრძოდა და იბრძვის სამშობლოს თავისუფლებისა თუ გლობალური უსაფრთხოებისათვის, სამშობლოს წინაშე თქვენი თავდადება უკვალოდ არ ჩაივლის, ჩვენ ყველანი ერთად, მივაღწევთ იმას, რომ საქართველო გამთლიანდება და ისეთი ქვეყანა გვექნება, როგორზეც ჩვენი დიდი წინაპრები ოცნებობდნენ.

მოგახსენებთ მადლობას თქვენი უანგარო სამსახურისა და თავდადებისათვის. გისურვებთ მხნეობას, ჯანმრთელობას და წარმატებას.

აფხაზეთის ავტონომიური რესპუბლიკის მთავრობა

აფხაზეთის სულიერებისა და კულტურის ცენტრში საქართველოსა და აფხაზეთის ხელოვნების დამსახურებული მოღვაწის, საქართველოს მართლმადიდებელი ეკლესიის წმინდა გიორგის ოქროს ორდენის კავალერის, მუსიკოლოგ სვეტლანა ქეცბას წიგნის „გულის სახსოვარი" პრეზენტაცია გაიმართა. კრებულში თავმოყრილია ავტორის სტატიები, გამოსვლები და მოგონებები აფხაზეთის შესახებ 1993 წლიდან დღემდე.

ღონისძიებას ესწრებოდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის უმაღლესი საბჭოს თავმჯდომარე ელგუჯა (გია) გვაზავა, მანგლისისა და თეთრიწყაროს ეპარქიის მიტროპოლიტი მეუფე ანანია, აფხაზეთის ავტონომიური რესპუბლიკის მთავრობის წევრები და უმაღლესი საბჭოს დეპუტატები, ხელოვნებისა და კულტურის სფეროს მოღვაწეები.

თბილისში აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და კლინიკა „ახალ მზერას" შორის გაფორმებული მემორანდუმის ფარგლებში დევნილებისათვის უფასო ოფთალმოლოგიური კვლევები ტარდება.

აქციას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე და აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის პირველი მოადგილე მარინა ონიანი დაესწრო.

გამოკვლევები ორი დღე გაგრძელდება, რომელშიც მონაწილეობას მაღალკვალიფიციური ექიმები მიიღებენ. დევნილებს ვიზომეტრია /კორექციით (მხედველობის სიმახვილის განსაზღვრა და სათვალის შერჩევა), ტონომეტრია (თვალშიდა წნევის გაზომვა), ოფთალმოსკოპია (თვალის ფსკერის გამოკვლევა), ბიომიკროსკოპია (თვალის გამჭვირვალე არეებისა და ფერადი გარსის ნაპრალოვანი ნათურით დათვალიერება) და შირმერის ტესტი (თვალის სიმშრალის ტესტი) ჩაუტარდებათ. ასევე, საჭიროების შემთხვევაში საკითხავ სათვალეს შეურჩევენ.

2016 წლის 03 ნოემბერს, ,,სამხედრო სავალდებულო სამსახურში მოქალაქეთა 2016 წლის საშემოდგომო გაწვევის შესახებ’’ საქართველოს მთავრობის 2016 წლის 28 ივლისის N349 დადგენილების საფუძველზე, აღმოსავლეთ საქართველოში აფხაზეთის ავტონომიური რესპუბლიკის მთავრობის წარმომადგენლობის წვევამდელთა აღრიცხვის, გაწვევისა და მობილიზაციის სამსახურის მიერ განხორციელდა აღმოსავლეთ საქართველოში მცხოვრებ დევნილ წვევამდელთა სამხედრო სავალდებულო სამსახურში გაწვევის ორგანიზება. აფხაზეთიდან დევნილი 20 წვევამდელი ცენტრალური გამწვევი სამედიცინო კომისიის გავლის შემდგომ ჩაირიცხნენ საქართველოს შეირაღებული ძალების რიგებში.

კულტურის ცენტრ „ოდიშის"  საკონცერტო დარბაზში ზუგდიდში ჩასახლებული დევნილი ბავშვებისთვის საქველმოქმედო კონცერტი გამართა. დამსწრე საზოგადოებისა და მოწვეული სტუმრების წინაშე აფხაზეთის სიმღერისა და ცეკვის სახელმწიფო ანსამბლი, მსახიობი დიმიტრი ჯაიანი და სხვადასხვა ფოლკლორული და თვითშემოქმედების კოლექტივები წარსდგნენ.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ესწრებოდა.

საქველმოქმედო კონცერტის ინიციატორი აფხაზეთიდან დევნილი როლანდ ჯობავა იყო.

აფხაზეთის ავტონომიური რესპუბლიკის საკუთრებაში არსებულმა ზუგდიდის აფხაზეთიდან იძულებით გადაადგილებულთა პოლიკლინიკამ, აფხაზეთიდან იძულებით გადაადგილებულ პირებსა და ენგურს გაღმა მაცხოვრებლებს, მორიგი სერვისი შესთავაზა დღის სტაციონარის სახით.

დღის სტაციონარი პოლიკლინიკაში ახლახან გაიხსნა და ის აღჭურვილია თანამედროვე ტექნოლოგიური აპარატურით, რომელიც აფხაზეთის ავტონომიური რესპუბლიკის მთავრობას ამერიკის შეერთებული შტატების საელჩომ გადასცა. აპარატურის ნაწილი უკვე დამონტაჟებულია, მეორე ნაწილი კი შემდეგ კვირას დამონტაჟდება.

ვახტანგ ყოლბაიას განცხადებით, ზუგდიდის დევნილთა პოლიკლინიკაში მსგავსი სერვისის დანერგვა მნიშვნელოვნად გააუმჯობესებს დევნილ პაციენტთა მომსახურების ხარისხს. მისივე თქმით იგივე იგეგმება აფხაზეთის სხვა პოლიკლინიკებშიც.

„ჩვენი დევნილებისთვის  მათ ჯანმრთელობასთან   დაკავშირებული ნებისმიერი მოქმედება ძალიან მნიშვნელოვანია.  ვფიქრობ, დღის სტაციონარი ერთ-ერთი იმათგანია, რაც მნიშვნელოვნად წაადგებათ ჩვენს დევნილებს. არის პაციენტთა კატეგორია, რომლებსაც სტაციონალური მკურნალობა  ესაჭიროებათ. ახალმა  სამედიცინო აპარატურამ მოგვცა იმის საშუალება, რომ ჩავატაროთ  სამედიცინო მანიპულაციები, რომელებსაც ადგილზე რამდენიმედღიანი წოლითი რეჟიმი ესაჭიროება.  პაციენტს შესაძლებლობა ეძლევა დღისით მოვიდეს, დაწვეს, მიიღოს შესაბამისი მომსახურება და საღამოს შინ დაბრუნდეს. ეს კი ენგურს გაღმიდან გადმოსული მოსახლეობისათვის, ვგულისხმობ გალს, ოჩამჩირეს და ა. შ.  ფასდაუდებელი სამსახურია.

კმაყოფილი ვარ დღევანდელი ღონისძიებით. მადლობას ვუხდი პოლიკლინიკის ხელმძღვანელ თამაზ ჯანაშიას გაწეული შრომისთვის. თავდაუზოგავი მუშაობისთვის მას აფხაზეთის უმაღლესი საბჭოს სიგელი გადავეცით. ყველას ვულოცავ დღის სტაციონარის პოლიკლინიკის ბაზაზე დანერგვას. შეგვიძლია თამამად ვთქვათ, რომ ჩვენი ჯანდაცვის სისტემაში შემოვიდა ახალი მომსახურება, რაც იმის საწინდარია, რომ მსგავსი მომსახურება  სხვა პოლიკლინიკებშიც დავნერგოთ“, - განაცხადა ვახტანგ ყოლბაიამ.

აფხაზეთის ავტონომიური რესპუბლიკის განათლებისა და კულტურის მინისტრმა დიმიტრი ჯაიანმა და მინისტრის პირველ მოადგილემ მანანა ქვაჩახიამ აფხაზეთის სკოლების ღვაწლმოსილ პედაგოგებს - მერი გაფრინდაშვილს, ვალია წურწუმიასა და თინა გვარამიას მასწავლებლის დღე მიულოცეს, ჯანმრთელობა და ხანგრძლივი სიცოცხლე უსურვეს. ასევე მათი დამსახურებისთვის  საპატიო სიგელები და საჩუქრები გადასცეს. პედაგოგებმა აფხაზეთში ცხოვრების წლები გაიხსენეს და აღნიშნეს, რომ კვლავაც შინ დაბრუნების იმედი ასულდგმულებთ.

5 ოქტომბერი მასწავლებელთა საერთაშორისო დღეა. ამ დღეს მსოფლიოს 100-ზე მეტი ქვეყანა აღნიშნავს. მასწავლებელთა ღვაწლის დაფასება, მათთვის პატივის მიგება და მადლობის გადახდა საზოგადოების განვითარებაში შეტანილი წვლილისათვის - ამ დღის ერთ-ერთი მთავარი გზავნილია.