აფხაზეთის მთავრობაში აფხაზეთის ფეხბურთის ფედერაციის პრეზიდენტმა მურად ანჯაფარიძემ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელ ვახტანგ ყოლბაიას დევნილი ბავშვებისთვის განკუთვნილი საფეხბურთო ეკიპირება გადასცა.

ბოლო წლების განმავლობაში აფხაზეთის მთავრობის ხელშეწყობითა და მხარდაჭერით, აფხაზეთიდან დევნილი ბავშვებისთვის არსებობს სპეციალური პროგრამა სახელწოდებით „სახალისო ფეხბურთის ღია სკოლები“, რომელშიც ჩართულნი არიან დევნილი ბავშვები. აფხაზეთის ფეხბურთის ფედერაციის ძალისხმევით ამ პროგრამის ფარგლებში ყოველწლიურად დევნილ ბავშვებს გარკვეული რაოდენობის საფეხბურთო ეკიპირება გადაეცემათ საჩუქრად.

აფხაზეთის ავტონომიური რესპუბლიკის მთავრობის ხელშეწყობით მსგავსი პროექტები მომავალშიც გაგრძელდება.

ქალაქ ზუგდიდის მერიისა და მუნიციპალიტეტის გამგეობის ორგანიზებით ზუგდიდობის დღესასწაული აღინიშნა. ამ დღესთან დაკავშირებით ქალაქის ცენტრში სხვადასხვა კულტურული და სპორტული ღონისძიებები გაიმართა. მოეწყო ქართველი მხატვრების ნამუშევართა და ხალხური რეწვის ნიმუშების გამოფენა. დადიანების სასახლის ეზოში გაიმართა საპატიო ზუგდიდელების დაჯილდოების ცერემონია და საზეიმო კონცერტი რომელშიც ქართული შოუბიზნესის წარმომადგენლები მონაწილეობდნენ.

ზუგდიდობის დღესასწაულს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის მთავრობის წევრები ესწრებოდნენ.

სამეგრელოში აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს მხარდაჭერითა და „აკადემიკოს გ. ჩაფიძის სახელობის გადაუდებელი კარდიოლოგიის ცენტრის“ ინიციატივით დევნილებს უფასო სამედიცინო გასინჯვები ჩაუტარდათ.

აქცია ზუგდიდის იძულებით გადაადგილებულ პირთა პოლიკლინიკაში ჩატარდა. სამედიცინო ჯგუფში იყვნენ კარდიოლოგი, ნევროლოგი და რევმატოლოგი. დევნილებს ელექტროკარდიოგრაფიული და საჭიროების შემთხვევაში, ექოკარდიოგრაფიული კვლევა ჩაუტარდათ.

„აკადემიკოს გ. ჩაფიძის სახელობის გადაუდებელი კარდიოლოგიის ცენტრი“ უფასო სამედიცინო გასინჯვებს საქართველოს ყველა რეგიონში ატარებს.  აფხაზეთის ავტონომიური რესპუბლიკის მთავრობასა და კლინიკას შორის თანამშრომლობა გაგრძელდება და სისტემატიურ ხასიათს მიიღებს.

გამოკვლევების მიმდინარეობის პროცესს მონიტორინგს აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე უწევდა.

სამედიცინო აქციას ორგანიზება აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრომ გაუკეთა.

წყალტუბოსა და კოპიტნარის დასახლებაში მცხოვრებ დევნილებს აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით „აფხაზეთიდან იძულებით გადაადგილებულ პირთა გასვლითი პროფილაქტიკური სამედიცინო გასინჯვების" პროგრამის ფარგლებში უფასო სამედიცინო გამოკვლევები ჩაუტარდათ.

სამედიცინო აქციაში მონაწილეობას თბილისის წამყვანი კლინიკებისა და დევნილთა სამედიცინო დაწესებულებების მაღალკვალიფიციური ექიმი-სპეციალისტები ღებულობენ. ჯგუფის შემადგენლობაში არიან ოჯახის ექიმი, თერაპევტი, პედიატრი, კარდიოლოგი, ნევროლოგი, გინეკოლოგი, რეპროდუქტოლოგი, ქირურგი,  ოფთალმოლოგი, ოტორინოლარინგოლოგი, ენდოკრინოლოგი, უროლოგი, ულტრასონოგრაფიის აპარატურით აღჭურვილი სპეციალისტი, დერმატოლოგი და ლაბორანტი. დევნილებს ლაბორატორიული და ინსტრუმენტული კვლევა ჩაუტარდათ.

სამედიცინო გამოკვლევებს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე, აფხაზეთის ავტონომიური რესპუბლიკის დევნილთა საქმეების დეპარტამენტის თავმჯდომარე კონსტანტინე კუჭუხიძე, იმერეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი ზაზა ჩაჩავა, წყალტუბოს მუნიციპალიტეტის საკრებულოს თავმჯდომარე პაატა ახალაძე, საქართველოს ვეტერანთა საქმეების სახელმწიფო დეპარტამენტის იმერეთის რეგიონალური სამსახურის უფროსის მოადგილე დათო ახრახაძე და ქუთაისის დიმიტრი ნაზარიშვილის სახელობის საოჯახო მედიცინის რეგიონალური სასწავლო ცენტრის დირექტორი მერაბ კვიცარიძე ესწრებოდნენ.

ასევე, აფახაზეთიდან იძულებით გადაადგილებულ პირებს საჭიროებისამებრ უფასოდ მედიკამენტები გადაეცათ.

საქართველოს კულტურისა და ძეგლთა დაცვის სამინისტროს, ეროვნული კინოცენტრისა და კინოცენტრ „ქართული ფილმი - აფხაზეთი"-ს მხარდაჭერით ცხინვალის მოსაზღვრე სოფელ ნიქოზში ანიმაციური ფილმების საერთაშორისო ფესტივალი მეექვსედ გაიმართა.

ფესტივალს დიდი სოციალურ-პოლიტიკური მნიშვნელობა აქვს, რადგან სოფელი ნიქოზი ცხინვალიდან 500 მეტრში მდებარეობს და მიუხედავად ამისა, არც ერთ მცხოვრებს არ დაუტოვებია.

ფესტივალის გახსნას აფხაზეთის ავტონომიური რესპუბლიკის მთავრობის თავმჯდომარე ვახტანგ ყოლბაია, კინოცენტრ „ქართული ფილმი - აფხაზეთი"-ს დირექტორი გელა კანდელაკი და ხელოვანთა წრის წარმომადგენლები დაესწრნენ.

"ნიქოზის" ფესტივალის პროგრამაში წარმოდგენილია მსოფლიო ანიმაციურ ფესტივალებზე გამარჯვებული ფილმები სხვადასხვა ქვეყნებიდან.

ასევე, ვახტანგ ყოლბაიამ და მოწვეულმა სტუმრებმა წმინდა ალექსანდრე ოქროპირის სახელოვნებო სკოლა დაათვალიერეს, სადაც მოზარდებს კინოცენტრ „ქართული ფილმი - აფხაზეთი"-ს წარმომადგენლები ასწავლიან.

თბილისში ბელარუსის რესპუბლიკის პირველი მასშტაბური ეროვნული გამოფენა გაიხსნა, სადაც ბელარუსის 150 მსხვილი კომპანიის პროდუქციასთან ერთად, ქართულ-ბელარუსული საწარმოს მიერ აწყობილი ტრაქტორებია წარმოდგენილი. გამოფენა მოიცავს ბელარუსული პროდუქციისა და მომსახურების ფართო სპექტრს: მანქანათმშენებლობა და ტრანსპორტი, სასოფლო-სამეურნეო და კვების პროდუქტები, სამეცნიერო მიღწევები და ახალი ტექნოლოგიები, ნავთობ-ქიმიური მრეწველობა, ფარმაცევტული პროდუქცია, მსუბუქი მრეწველობა, ხისა და სამშენებლო მასალების წარმოება, ტურისტული მომსახურება, სამომხმარებლო საქონელი და სხვა.

ღონისძიებას საქართველოს პრემიერ-მინისტრი გიორგი კვირიკაშვილი, ბელარუსის ვიცე-პრემიერი მიხაილ რუსი, საქართველოს მთავრობის წევრები და აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია დაესწრნენ.

თბილისში გამართული ბელარუსის რესპუბლიკის პირველი მასშტაბური ეროვნული გამოფენის  მიზანია ორი ქვეყნის ურთიერთობის განმტკიცება, რაც ხელს შეუწყობს ქართველი და ბელარუსი ხალხის კიდევ უფრო დაახლოებას, სავაჭრო და ტურისტული საქმიანობის გაღრმავებას.

აფხაზეთის ავტონომიური რესპუბლიკის მთავრობისა და ინტეგრაციისა და სოლიდარობის საერთაშორისო ფონდ ,,ფინსოლს'' შორის დადებული მემორანდუმის ფარგლებში აფხაზეთის ავტონომიური რესპუბლიკის დევნილთა დეპარტამენტის ორგანიზებითა და გალის რაიონის საგანმანათლებლო რესურსცენტრის ხელშეწყობით აფხაზეთიდან იძულებით გადაადგილებული, სოციალურად დაუცველ ოჯახებში მცხოვრები 20 მოზარდი, მათ შორის გალის ოკუპირებული ტერიტორიიდან, 2 თვის განმავლობაში მოხალისე ოჯახების მიწვევით ესპანეთის სამეფოში დასასვენებლად იმყოფებოდა.

მოზარდებს შესაძლებლობა ჰქონდათ ესპანელი ხალხის კულტურას გაცნობოდნენ, დაეთვალიერებინათ ღირსშესანიშნავი ადგილები და შეესწავლათ ესპანური ენა. დღეს, სამშობლოში დაბრუნებულ ბავშვებს თბილისის საერთაშორისო აეროპორტში აფხაზეთის ავტონომიური რესპუბლიკის დევნილთა დეპარტამენტის უფროსის მოადგილე გიორგი ბულისკერია, გალის საგანმანათლებლო რესურსცენტრის უფროსი ნონა შონია და მშობლები დახვდნენ.

აფხაზეთის ავტონომიური რესპუბლიკის მთავრობა და ფონდი ,,FINSOL" 2008 წლიდან თანამშრომლობენ. ფონდის ორგანიზებითა და დაფინანსებით აფხაზეთიდან იძულებით გადაადგილებული მოზარდები ესპანეთში საზაფხულო არდადაგებს ყოველწლიურად ატარებენ.

30 აგვისტოს ომში უგზო-უკვლოდ დაკარგულ მებრძოლთა საერთაშორისო დღე აღინიშნება. ვაშლიჯვარში ძმათა სასაფლაო „გმირთა სავანეზე" აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის ავტონომიური რესპუბლიკის უმაღლესი საბჭოს დეპუტატებმა და აფხაზეთის მთავრობის წევრებმა, საკრებულოს ფრაქცია „ქართული ოცნება - თბილისელების" თავმჯდომარემ გულიკო ზუმბაძემ, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის აფხაზეთის ავტონომიური რესპუბლიკის, ყოფილი სამხრეთ ოსეთის ოლქის საკითხთა და სამოქალაქო ინტეგრაციის დეპარტამენტის უფროსმა ზვიად ზვიადაძემ და საქართველოს შეიარაღებული ძალების გენერალური შტაბის წარმომადგენლებმა საქართველოს ტერიტორიული მთლიანობისათვის ბრძოლებში დაკარგულ მებრძოლთა პატივსაცემად, საქართველოს ტერიტორიული მთლიანობისთვის ბრძოლებში დაღუპულ გმირთა მემორიალი და საფლავები ყვავილებით შეამკეს.

ასევე, საპატრიარქოსთან არსებული ახალგაზრდობის სულიერი და ინტელექტუალური განვითარების ცენტრში წითელი ჯვრის საერთაშორისო კომიტეტის მხარდაჭერით, ფონდ „მოლოდინის" და უგზო-უკვლოდ დაკარგულ პირთა ოჯახების ორგანიზებით უგზო-უკვლოდ დაკარგულთა საერთაშორისო დღისადმი მიძღვნილი ღონისძიება გაიმართა.

ღონისძიებას აფხაზეთის ავტონომიური რესპუბლიკის მთავრობის თავმჯდომარე ვახტანგ ყოლბაია და ომის ინვალიდთა და ვეტერანების საქმეთა სახელმწიფო სამსახურის დირექტორის მოადგილე ჯანრი უბირია ესწრებოდნენ.

აფხაზეთის ავტონომიური რესპუბლიკის მთავრობა ღრმა მწუხარებას გამოთქვამს იტალიის რესპუბლიკაში მომხდარი მიწისძვრის დაღუპულთა და დაშავებულთა  გამო.  

აფხაზეთის ავტონომიური რესპუბლიკის მთავრობა უსამძიმრებს გარდაცვლილთა ოჯახებს და მორალურ თანადგომას უცხადებს იტალიელ ხალხს, იტალიის ხელისუფლებასა და იტალიის რესპუბლიკის ელჩს საქართველოში ანტონიო ენრიკო ბარტოლის.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია სენაკის სამხედრო დასახლებაში მცხოვრებ სტიქიით დაზარალებულ აფხაზეთიდან დევნილ მოსახლეობას შეხვდა და ადგილზე მიმდინარე აღდგენით სამუშაოებს გაეცნო.

„სენაკის სამხედრო დასახლებაში სტიქიური მოვლენების დროს დაზიანებული სახლების აღდგენა მიმდინარეობს. სამუშაოებს თვალყურს ადევნებენ  გუბერნატორი, ადგილობრივი ხელმძღვანელობა, დევნილთა და განსახლების სამინისტრო. დაზიანებულია 3 კორპუსი, რომლებსაც სტიქიამ სახურავი გადახადა, ამათგან უკვე გადახურულია 2. დარჩენილია ტექნიკური დეტალები, რომლის შემდეგაც, დაახლოებით 10 დღეში, ეს ორი კორპუსი დასრულდება. მესამე კორპუსი ნახევრად გადახურულია, ისიც რამდენიმე ხანში დასრულდება, შემდეგ კი გეგმიურად წარიმართება დანარჩენი სამუშაოები, რომელიც კორპუსების სრულყოფილი აღდგენისთვისაა გათვალისწინებული.

ამ სამუშაოების გამხორციელებისთვის სერიოზული სახსრები გამოყო დევნილთა და განსახლების სამინისტრომ. გადაწყდება მოსახლეობისთვის ყველაზე მტკივნეული საკითხი, სადრენაჟო სისტემის მოწესრიგება. წლების მანძილზე ამ სახლების სარდაფებს წყალი აქვს შეყენებული, რომელიც სერიოზულ საფრთხეს უქმნის შენობებს და მოსახლეობას. ვფიქრობ, რომ აქ ძალიან საფუძვლიანად კეთდება ყველაფერი.

მახარებს ის, რომ სამხედრო დასახლების მცხოვრებლები კმაყოფილები არიან შესრულებული სამუშაოების ხარისხით. რამდენიმე ხანში შეიცვლება  ვითარება, აღმოიფხვრება სტიქიით მიყენებული ზარალი და მოსახლეობა შეძლებს უსაფრთხოდ და ადრინდელთან შედარებით უფრო კომფორტულად იგრძნოს თავი ", - განაცხადა ვახტანგ ყოლბაიამ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ქალაქ ჯვარში მცხოვრებ აფხაზეთიდან დევნილ მოსახლეობას შეხვდა და ადგილზე გაეცნო მათთან არსებულ პრობლემებს. ჯვარში ამჟამად 3000-ზე მეტი დევნილი ცხოვრობს. მათი ძირითადი პრობლემები ჯანდაცვის საკითხებსა და დასაქმებას ეხება. ვახტანგ ყოლბაიამ ასევე მოინახულა ოჯახი, სადაც რამდენიმე მძიმე ავადმყოფი ცხოვრობს.

„დევნილთა მხრიდან იყო თხოვნა, რომ მივსულიყავით მათთან, ჯვარში, რადგან სხვა მრავალ საკითხთან ერთად, ჯანმრთელობის პრობლემებს უჩივიან. მათთვის, როგორც თავად განაცხადეს, უმნიშნელოვანესია პროფილაქტიკური გამოკვლევები და ჯანმრთელობის მდგომარეობის პრევენცია, რომელიც საშუალებას იძლევა სწორად დასმული დიაგნოზის საფუძველზე ჩაიტარონ მკურნალობა. ამის მიღწევა კი მხოლოდ წისასწარი პროფილაქტიკური გამოკვლევების პირობებშია შესაძლებელი. სწორედ ამიტომ ვცდილობთ, რაც შეიძლება ხშირად ჩავატაროთ გამოკვლევები. ზუგდიდში ახლა დავასრულეთ გამოკვლევები, რომელმაც მოსახლეობის დიდი რაოდენობა მოიცვა. ჩვენ ვარიგებთ მაღალი ხარისიხის მედიკამენტებს მოსახლეობაში, რა თქმა უნდა უფასოდ, რომ მათ პრობლემები არ შეექმნათ წამლის ფასთან ან მის შოვნასთან დაკავშირებით. დღეს მოვინახულე ოჯახი, რომელსაც ქალიშვილი ჰყავს ძალიან მძიმედ. მისი დედაც მძიმე მდგომარეობაში ვიხილეთ. მიუხედავად იმისა, რომ მათ ყველა ეხმარება, დაწყებული ადგილობრივი ხელისუფლებით და დამთავრებული ჩვენით, მაინც პრობლემა პრობლემად რჩება და ავადმყოფობა ვერ იკურნება. საქმის კურსში კი გვამყოფებს ჯვარში ჩვენი პოლიკლინიკის ხელმძღვანელი გოჩა ლიპარტია, რომელიც ყოველდღიურ დახმარებასა და კონტროლს უწევს ამ სიტუაციას.

ჯვარში 3000-ზე მეტი დევნილი ცხოვრობს. როგორი საკვირველიც უნდა იყოს, ადგილობრივს დევნილი მოსახლეობა ჭარბობს. ბუნებრივია, მწვავედ დგას სამუშაო ადგილების პრობლემა. დასაქმების თვალსაზრისით, პრობლემების რაღაც ნაწილი გადაწყდა, მაგრამ ეს არ არის საკმარისი. სამუშაოს ისინი ძირითადად მომსახურების სფეროში პოულობენ, სეზონურ სამუშაოებსაც ეტანებიან, მაგრამ სტაბილური  შემოსავალი მათ არ გააჩნიათ. ბევრი მათგანი დასაქმებულია ენგურჰესზე. ადრე ფუნქციონირებდა გადამამუშავებელი ობიექტები, მაგრამ  ახლა ყველა გაჩერებულია. გაჩნდა ლიცენზიების პრობლემაც ტყის ჭრასთან დაკავშირებით. თანხების ნაწილს ადგილობრივი ხელისუფლება ახმარს სოციალურ ობიექტებს, კულტურის სახლის, კულტურული და დასვენების ობიექტების მშენებლობას. მაგრამ ადამიანებს უწინარესად მატერიალური საზრდო ესჭიროებათ, რომ ოჯახები გამოკვებონ. ჩვენ ხშირად ვივლით აქ, რომ უფრო კონკრეტული დახმარება გავუწიოთ ჩვენს დევნილებს. მთავარი კი ისაა, რომ მათ თავი მიტოვებულად არ იგრძნონ, უნდა იცოდნენ, რომ ჩვენ მათ გვერდით ვართ", - განაცხადა ვახტანგ ყოლბაიამ.

აფხაზეთის ავტონომიური რესპუბლიკის ჯანდაცვის სამინისტროს ორგანიზებით, ზუგდიდის დევნილთა საოჯახო მედიცინის ცენტრში აფხაზეთიდან დევნილ მოსახლეობას სამედიცინო გამოკვლევები ჩაუტარდათ და მედიკამენტები დაურიგდათ. გამოკვლევებში თბილისის რამდენიმე წამყვანი კლინიკის სპეციალისტები მონაწილეობდნენ, მათ შორის ღუდუშაურის ეროვნული ცენტრიდან, მრავალპროფილური ცენტრი „მზერადან“, ჟორდანიას ინსტიტუტიდან და სხვა.

გამოკვლევების მიმდინარეობის პროცესს მონიტორინგს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე უწევდნენ.

აქცია სამეგრელო-ზემო სვანეთის რეგიონში აფხაზეთის მთავრობის წარმომადგენლობის მხარდაჭერით ჩატარდა.

ხუთდღიანი პატიმრობის შემდეგ, ზუგდიდის რაიონის სოფელ რუხში მცხოვრები ორი ქართველი სიმბოლური ჯარიმის სანაცვლოდ გაათავისუფლეს.

ემზარ მატკავა და ლევან მორგოშია 14 აგვისტოს, მდინარე ენგურზე თევზაობის დროს დააკავეს. მათ ბრალად ედებოდათ ეგრეთ წოდებული საზღვრის უკანონოდ გადაკვეთა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია საოკუპაციო რეჟიმის მიერ გათავისუფლებულ რუხში მცხოვრებ ემზარ მატკავას და ლევან მორგოშიას პირადად შეხვდა და შინ  მშვიდობიანად დაბრუნება მიულოცა. აფხაზეთის ლეგიტიმური მთავრობის ხელმძღვანელმა მედიის წარმომადგენლებთან საუბრისას განაცხადა, რომ რუსი მესაზღვრეების მიერ  საზღვრის დარღვევის ბრალდებით ქართველების პატიმრობაში აყვანა, იყო უსამართლო აქტი, ვინაიდან არავითარი კავშირი არ ჰქონდა ეგრეთწოდებული საზღვრის უკანონოდ გადაკვეთასთან, მითუმეტეს მეთევზეობასთან და მასთან დაკავშირებულ მოქმედებებთან.

ვახატანგ ყოლბაიამ, ასევე აღნიშნა, რომ მატკავა და მორგოშია ყველაზე მეტად გაახარა იმ ფაქტმა, რომ აფხაზებს ძალიან გაუკვირდათ ქართველების დაკავება და რუსი მესაზღვრეების საქციელი არაკანონიერად მიიჩნიეს. საბოლოოდ კი ეგრეთწოდებულმა სასამართლომ სიმბოლური თანხის 2400 რუბლის ფასად, რაც 82 ლარის ეკვივალენტია, მოახდინა დაპატიმრებულების განთავისუფლება.

„მინდა გულითადი მადლობა გადავუხადო ჩვენს ხელისუფლებას მორალური მხარდაჭერისთვის. დღეს მთელი ოჯახი ვიმყოფებით უფასო სამედიცინო გამოკვლევაზე, რომელიც აფხაზეთის ჯანდაცვის სამინისტროს მიერ ტარდება. მოხარული ვარ, რომ მომეცა შესაძლებლობა, უშუალოდ შევხვედროდი და მადლობა მეთქვა ბატონი ვახტანგ ყოლბაიასათვის, რომლის თანადგომაც ძალიან დიდი იმედია ჩვენთვის. ასევე მინდა ჩვენი ოჯახების სახელით დიდი მადლობა გადავუხადო ჩვენი თავდაცვის, შინაგან საქმეთა და  შერიგების სამინისტროებს, რომელთა დაინტერესება და მონაწილეობა ამ იმნციდენტში ჩვენთვის უმნიშვნელოვანესი იყო", - განაცხადა ერთ-ერთი დაკავებულის  შვილმა.

აფხაზეთის ავტონომიური რესპუბლიკის მთავრობის ფინანსური მხარდაჭერითა და აფხაზეთის ავტონომიური რესპუბლიკის განათლებისა და კულტურის სამინისტროს კულტურულ ფასეულობათა დაცვის სამსახურის ორგანიზებით, აფხაზეთიდან და სამაჩაბლოდან დევნილი მოზარდები ატენის  კულტურულ-საგანმანათლებლო საველე ბანაკში გაემგზავრნენ.

მოზარდები  ბანაკში აფხაზეთის ავტონომიური რესბუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ და აფხაზეთის ავტონომიური რესპუბლიკის განათლებისა და კულტურის მინისტრმა დიმიტრი ჯაიანმა გააცილეს.

კულტურულ-საგანმანათლებლო საველე ბანაკი გორის რაიონში, კერძოდ კი, ატენის ხეობაში, მდინარე ტანას მახლობლად მოეწყობა, სადაც კარვების ქალაქში 40 მოზარდი 5 დღის განმავლობაში დაისვენებს. პროექტის ფარგლებში მათთვის განხორციელდება როგორც შემეცნებითი, აგრეთვე სპორტულ-გასართობი შინაარსის მრავალმხრივი აქტივობები, რომელთაც უზრუნველყოფენ ახალგაზრდული ორგანიზაცია „კოდის სათემო განათლების ცენტრის“ წარმომადგენლები.

მოეწყობა ლაშქრობები იმავე ხეობაში არსებულ ისტორიულ ძეგლებზე, რომელთა მაგალითზეც ბანაკის მონაწილეები შეისწავლიან კულტურული მემკვიდრეობის ძეგლების დათარიღებისა და მახასიათებლების აღქმის მეთოდებს.

ბანაკში უპირატესად  ომის ვეტერანთა, სოციალურად დაუცველთა, მრავალშვილიანთა და კომპაქტურად ჩასახლებულთა ოჯახების შვილები დაისვენებენ.

14 აგვისტოს, აფხაზეთში შეიარაღებული კონფლიქტის დაწყებიდან 24 წელი შესრულდა. ამ თარიღთან დაკავშირებით აფხაზეთის მეომართა კავშირის ინიციატივით, რუსთაველის გამზირიდან - გმირთა მოედნამდე მსვლელობა მოეწყო. გმირთა მოედანზე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის უმაღლესი საბჭოს თავმჯდომარემ ელგუჯა გვაზავამ, აფხაზეთის მთავრობის წევრებმა, აფხაზეთის უმაღლესი საბჭოს დეპუტატებმა და აფხაზეთის მეომართა კავშირის წევრებმა გმირთა მემორიალი გვირგვინით შეამკეს და კიდევ ერთხელ პატივი მიაგეს საქართველოს ტერიტორიული მთლიანობისათვის დაღუპულთა ხსოვნას.

აფხაზეთში შეიარაღებული დაპირისპირება 1992 წლის 14 აგვისტოს დაიწყო, რომელიც ომში გადაიზარდა. პირველი შეტაკებები ოჩამჩირისა და გულრიფშის რაიონებში მოხდა. სამხედრო დაპირისპირება 403 დღე გაგრძელდა, რასაც ორივე მხრიდან ათიათასობით მშვიდობიანი მოქალაქე და ჯარისკაცი შეეწირა, ხოლო იმ დროისათვის სამასი ათასამდე ადამიანი დევნილი გახდა.